內地急降進口稅 購物天堂成絕響
屋漏偏逢連夜雨。本港旅遊同零售業營商環境畀激進分子反水客行動搞一搞，本來已經走下坡，內地大幅調低部分日用消費品進口關稅，更係雪上加霜，點止步入寒冬咁簡單吖，直頭墜入絕境喇。「東方報業民意調查」顯示，唔少市民對本港失去購物天堂優勢感到擔憂，你話死未？
嗱，內地今日起降低部分服裝、鞋靴、護膚品、紙尿片等日用消費品嘅進口關稅，稅率平均降百分之五十以上，減幅超乎預料。本報記者格過價，發現減稅後深圳紙尿片同香港售價相差無幾，部分貨品甚至比香港更平，即係話香港貨品冇乜競爭力喇。
係人都知，香港成為購物天堂主要受惠於零關稅，家陣港幣因為聯繫匯率持續高企，多個旅遊熱點國家嘅貨幣不斷貶值，香港嘅吸引力大不如前，內地高端旅客紛紛湧往南韓、日本及歐美等地掃貨。依家到香港購物嘅主要係低端旅客同水客，內地減低入口稅後，隨時連呢啲客都冇埋。
「東方報業民意調查」結果反映市民對旅遊同零售業前景嘅憂慮，其中兩成五受訪者擔心香港失去購物天堂優勢；三成二人認為消費將進一步放緩；兩成六憂慮零售旅遊業將雪上加霜。亦有旅遊業界立法會議員擔心，香港作為免稅港嘅吸引優勢一年後將會消失。
數字冇花冇假，本港零售業舊年首次錄得負增長，今年頭兩個月零售額跌咗百分之二，「五一」小黃金周更係唔見黃金。之所以搞成咁，係因為中港矛盾惡化，激進組織趕客，而當局落實「一周一行」政策，進一步打擊內地客來港意欲。調查發現，近三成受訪者認為，反水貨客示威及實施「一周一行」，令本港好客之都嘅旅遊聲譽受損；三成六人擔心嚇走真正旅客。
話時話，中港矛盾問題由來已久，早有人建議港府喺邊境設立購物城，方便內地客購物之餘，又可以減少對市區嘅壓力，點知港府好似借咗聾耳陳隻耳咁，始終無動於衷，直至月前至有私人機構提出修建邊境購物城，可惜時不我與，錯過時機。上述調查發現，對於興建邊境購物城討論多時仍未落實，三成六受訪者認為已失去優勢，近兩成人認為白白浪費咗商機。
一句講晒，禍福無門，唯人自招。香港由購物天堂變成趕客之都，都係自己攞嚟，與人無尤，叮！
