城中鏡：陳曾麗娜遊法遇竊唔掃興

Sally早前同老公陳家樹遊花都巴黎，甫抵達機場就中招。起初航空公司職員解釋係行李延誤，安撫佢返酒店等等。誰不知晚上收到三件行李時，明顯有被搜掠過的痕迹。雖然衣物無唔見，但價值最貴嘅名牌手袋就被賊人偷走。Sally懷疑失竊係航空公司「內鬼」所為，馬上致電投訴。

有職員坦言，知道有不法之徒專打中國人行李同名貴行李箱主意，惟失竊防不勝防，只好賠償一千英鎊畀Sally。筆錢計落唔夠買番個同款手袋，但Sally話旅行旨在開心，唔再追究。幸好轉頭佢又掃入四個新款手袋，退埋稅等於香港價錢嘅七折，開心到極。

遊完巴黎前，佢哋再飛去探索古巴，當地民風淳樸，治安反而比巴黎好。Sally話臨走前一天，佢同友人將行李及財物放晒上旅遊巴，再乘車作市內觀光，每到一個景點，只留下司機看守行李，最後所有財物都安然無恙。