城中鏡：趁早搵出路
中學文憑試下月就放榜，唔只學生緊張考試成績，部分家長亦好關心子女出路。尋日喺沙田馬場見到一班事業有成嘅政商界名人，唔知佢哋當年又係點樣規劃自己嘅人生呢？中華廠商聯合會副會長楊志雄就自爆，年輕時為咗多一條出路，連的士牌都考埋。
雷禮權話年輕人要有好發展，朋輩嘅影響好重要。
楊志雄（右）笑言識咗太太（左）後，先懂得規劃人生。
馮載祥（右）同太太馮馬潔嫻（左）讀書時，都係一心想入政府工作。
楊志雄考定的士牌傍身
楊志雄話爸爸當年賣收音機起家，可惜其後投資黃金失利，加上當年又冇儲蓄嘅觀念，佢惟有努力進修去搵出路，仲有殺錯冇放過，連的士牌都考咗先，以防第日搵唔到工，都有門求生技能，好彩最後用唔着。為咗令到年輕人有多啲嘅出路，佢經常會帶學生參觀唔同類型嘅廠房，等學生可以認識多啲唔同嘅發展可能性。
立法會前秘書長馮載祥情況就有啲唔同，佢話自細已決心要做官，於是勇往直前，努力讀書，其後如願以償做到政務官後，當然開心啦。
佢覺得年輕人最緊要有清晰目標，只要想做，就一定會做到，埋怨係冇用，要諗辦法實現先啱。
雷禮權：朋輩影響要緊
九巴董事雷禮權就話受身邊朋友及同學影響，十幾歲時就已好清楚將來要點發展。佢認為年輕人容易受到朋輩及周圍嘅氣氛影響，如果身邊個個朋友一早已經規劃將來，自己自然亦會思考，所以揀到間好學校及識到目光遠大嘅朋友好緊要。不過，藝育菁英基金主席方黃吉雯就另有睇法，認為唔一定要有框框限制自己發展，應隨住社會轉變而把握機會自由發展，多參考長輩意見及自我增值，總會搵到合適嘅出路。
