政壇：王賢誌靚聲講古感人
東華三院早前舉行全港校際「好人好事」英文故事寫作比賽，鼓勵學生發掘身邊感人故事，並藉此提升學生英語寫作嘅興趣，總共有千多份參賽作品，最後九人勝出獲獎。雖然比賽結束，但東華三院搵嚟城中多位名人「聲演」得獎故事。天生一把洪亮聲線嘅東華三院副主席Vinci王賢誌，就義不容辭，幫手推出發聲故事書，搵埋另一副主席陳祖恒一起「聲演」，讀出九篇觸動人心嘅得獎故事。
王賢誌（中）獻出靚聲，錄製英文發聲書，副主席馬陳家歡（左）同埋前主席陳文綺慧都讚不絕口。
對於曾擔任大小活動主持嘅Vinci，錄書真係駕輕就熟，今次開咪講英文故事，有書照讀，絕對難佢唔到。佢話希望青年人學到純正發音之餘，同時透過聲音同文字，表揚關愛。話晒發聲書係心血，Vinci日前出席東華歷屆主席會午宴時，就畀大家先睹為快。歷屆主席會主席孫秉樞即場拎起支感應筆「嘟」吓本書，大讚好新奇，不禁話人生要活到老、學到老。
