政壇：黃以謙自諷政界茄喱啡
曾經應徵過副局長但落選嘅精神科醫生黃以謙，原來早喺九九年當選九龍城區議員至今，係較早一批走入政圈嘅專業人士，佢形容做區議員就好似做藝人。曾有數名藝人同娛樂公司高層同佢講，每次簽入二十個靚女，先有一個好似前港姐季軍佘詩曼咁紅，行錯一步，就注定要做茄喱啡，如果做區議員嘅話，邊有二十個之中跑出一個咁好命吖。
黃以謙自嘲係政界「茄喱啡」。（資料圖片）
黃以謙喺新書中透露，經常有人問佢作為專科醫生，點解要做區議員，佢初時以為做區議員係政治「上位」捷徑，但做咗多年區議員，先領悟係此路不通，依家唯一動力係民意為何物。
佢其後提到，近年每隔數個月，就有專業人士搵佢，請教應否參選區議員，佢首先會問對方點解想做區議員，事關如果係為名或為權力，會叫對方諗清楚，如果係為見識人生百態嘅話，佢就會鼓勵對方去嘗試，因為會睇到香港政治真面目、學懂人生智慧喎。咁大感觸，唔通佢覺得自己嘅政途好坎坷？
