政壇：鬍鬚曾甩身 陳家強有排捱

通過預算案「鬆口氣」

鬍鬚曾喺最新網誌以「鬆了兩口氣」為題，話兩件記掛多時嘅工作順利完成，一連鬆咗兩口氣，其中一口氣係立法會通過本年度預算案，佢形容預算案「拉布」非首次，大家可能覺得佢誇大其詞，又想搵機會責難「拉布」議員，但佢強調，今年審議過程嘅八十多次點算人數，都冇出現流會，係有驚無險，事關如果出現一次流會，預算案就要本周三才能三讀，到時當局必須啟動第二階段嘅應變計劃。

其後佢提到，港府再次成功發售十億美元、年期五年嘅伊斯蘭債券。佢透露，經過舊年佔領行動，很多外國商人同投資者都開始關注香港政治風險，其中有人擔心香港政治爭拗不絕，既阻礙政府施政，更損害香港穩定、法治及效率。

鬍鬚曾續指國際投資者於此時熱烈認購港府債券，無要求額外風險，反映市場對香港有相當信心，可以話係過咗一關、鬆咗一口氣，又強調希望大家珍惜眼前並非必然嘅優勢，繼續跨越往後挑戰。

不過，同鬍鬚曾同屬問責官員嘅陳家強，有排都未可鬆口氣，一來蓮塘/香園圍口岸撥款直接闖關財務委員會遇到阻力，再有泛民事前張揚會「拉布」嘅創新及科技局撥款，陳家強望天打卦，都唔知幾時先見到撥款申請通過嘅一日。