港鐵發財須立品 直接減價最實際

嗱，根據可加可減機制，港鐵下月二十一日起又奉旨加價，平均加幅百分之四點三，部分路線加幅超過一成，其中馬鐵線車公廟站來往沙田圍站，加價高達一成四添，預計可帶來約六億元額外收益。同以前加價一樣，港鐵例牌推出多項優惠，包括延長即日第二程九折優惠五個月，以及今年聖誕節、明年農曆新年同復活節假期，共六個假日推出約半價乘車優惠，加加埋埋五億元，相對於六億元嘅額外收益，有「打斧頭」之嫌。

即係咁，港鐵賺多六億，攞其中五億出嚟回饋乘客，表面上相差唔多，其實係玩數字遊戲，乘客實際受惠相當有限。係人都知，呢啲優惠雷聲大雨點小，第二程打九折，只係延長五個月，小恩小惠，至於幾個節日提供半價優惠，更加係得啖笑，試諗吓，有幾多人會為咗雞碎咁多嘅所謂優惠，專登喺假日搭港鐵呢？正如有市民話齋，與其推出呢啲不切實際嘅優惠，不如直接減價仲好喇。

有民間監察組織負責人直指票價機制「搵笨」，假期半價優惠係「整色整水」，打工仔難以受惠。有立法會議員更不滿可加可減機制「只加不減」，促請當局盡快檢討。

冇錯嘞，港鐵年年賺過百億，仲堅持年年加價，全世界絕無僅有，實在好難唔令人質疑。雖然港鐵係根據機制加價，有法可依，但法律不外乎人情，何況可加可減機制唔係法律，可以靈活變通嘅啫。如果港鐵真係為市民着想，就算唔直接減價，最少都應該凍結票價喇。講到尾，港鐵始終係公共交通機構，而且港府仲係大股東，無論如何都唔可以唯利是圖。

再講喇，港鐵票價不斷上升，而服務質素就不升反跌，搞到事故頻頻，唔係通訊系統出事，就係路軌有問題，今時今日咁嘅服務態度點得。仲有吖，港鐵負責興建嘅五條新鐵路線問題多多，烏龍百出，無一不延誤，無一不超支，呢筆數又點計先？淨係高鐵超支就達到二百幾億元，都唔知要點樣填氹。

講多無謂，食多會滯，減價最實際。港鐵話晒係一間大企業，負起社會責任都好應該啫，係咪！