政壇：歐盟主席講笑寸盡左右派
地中海難民問題及疑歐派抬頭，近年令歐盟陷入一片吵鬧。歐盟委員會主席容克未知是否想緩和氣氛，日前在峰會上竟當眾大叫匈牙利總理歐爾班做獨裁者，更寸爆希臘總理齊普拉斯無打呔，開盡左右兩派玩笑。
歐爾班（左）、 容克（右）
前盧森堡首相容克早前在拉脫維亞的歐盟峰會前，在大批記者面前高呼：「獨裁者來了！（The dictator is coming!）」東道主拉脫維亞總理斯特勞尤馬聞言，立即臉部繃緊地哈哈大笑，明顯感到尷尬。但容克仍未夠喉，上前向歐爾班「問好」：「哈囉！獨裁者。」然後再拍一拍他的右頰。臨危不亂的歐爾班輕鬆應對，向容克回禮說：「你好，大公。（Hello Grand Duke.）」而容克根本並非盧森堡大公。事後歐爾班發言人亦試圖緩和氣氛，稱兩人享受互相戲謔。歐爾班右翼政府去年曾欲徵收「互聯網稅」，美國參議員麥凱恩曾批評歐爾班為「新法西斯獨裁者」，容克明顯借機再將歐爾班奚落一番。近日歐爾班又欲修憲收緊移民法及恢復死刑，與歐盟關係緊張。
此外，容克亦不放過希臘總理齊普拉斯，嘲諷他不打領呔的習慣。希臘陷入歐債危機經濟幾近崩盤，難道容克暗諷齊普拉斯無錢買呔？
