政壇：搞搞政：建制跟風網頁「去黨化」
佔領行動後，香港幾個月間多咗十幾個以地區做牌頭嘅組織，佢哋全部喺社交網站有晒專頁，例如青年新政、乜乜動力、乜乜網絡等，以無政黨新旗幟主打民生議題，隨時準備參戰年底區議會選舉。據聞建制派感到呢類泛民組織會帶來威脅，近月都跟風成立唔少「去政黨化」嘅地區專頁，以制衡泛民。弊在泛民建制都用呢一招，市民會唔會花多眼亂，搵唔到光譜呢？
（設計圖片及對白）
讚好人士揭關係
經我哋明查暗訪，發現網上好多新成立嘅社區組織專頁，例如「啟德晴朗會」、「秀茂坪青年團」、「將軍焦點」、「東區頻道」、「東區新動力」、「南區觸覺」等，清一色只講區內民生議題，但撳入去專頁就見絕大部分「讚好」嘅人，不約而同都係來自三大建制派政黨，分別係民建聯、新民黨同自由黨，睇嚟呢啲組織同建制派政黨都有好緊密嘅聯繫喎。
有建制派人士透露，佢哋發現呢類地區專頁成效極佳，由於不分黨派，地區內一旦有咩突發事情，例如早前黑色暴雨，邊度有水浸，居民都可以透過呢啲專頁「報料」，咁服務當區嘅社區主任就可以第一時間趕赴現場。
只係大家都「去政黨化」，整啲隱形二梯隊、三梯隊出嚟，容乜易區議會選舉中間派票源被人搶晒？
