政壇：慢必獲十萬秘密捐款
泛民主派多名立法會議員早前被踢爆收受壹傳媒集團前主席黎智英秘密捐款，廉政公署調查至今仲未有進一步行動。我哋近日翻查立法會議員向秘書處提交嘅利益申報，發現人民力量陳志全（慢必）今年四月都收咗一筆為數十萬元嘅神秘捐款，但佢就講到明因為捐贈者唔想公開名字，認真神秘。
陳志全（慢必）
雖然慢必唔肯公開呢位捐贈者嘅身份，但佢就透露對方係人力主席袁彌明丈夫林雨陽嘅朋友，因為見到佢大半年前搞咗個「大愛糧品」實驗計劃，向貧窮長者派飯盒、生果同日用品等，所以特意捐款，仲講到明捐款要用嚟派發糧食畀各區貧窮人士添。慢必話，之前佛誕已經用咗部分捐款派米畀長者，但佢就希望可以發揮大啲嘅作用。
慢必嘅同事諗頭多多，有人建議不如向長者派發啲有營養嘅食物，例如有機菜。不過，慢必就覺得個建議「太離地」，因為有機菜較貴，「似中產嘢」，想更好運用捐贈咁話。
