政壇：支聯會學聯累鬥累
由支聯會主辦、一年一度嘅六四晚會周四舉行，但今年泛民陣營大分裂，原本係學聯成員嘅香港大學同浸會大學學生會都有意另起爐灶搞晚會，加埋去年已經喺尖沙咀文化中心舉辦活動嘅熱血公民，結果六四晚會史無前例鬧四胞，雖然支聯會嗰個晚會先係老牌，但參加者勢必買少見少。其實，呢次學聯失勢拖累支聯會，但支聯會又係本土派搞退聯嘅一個原因，真係唔知邊個累邊個咯。
（設計圖片及對白）
恐26年來最少人一次
學聯早排爆出退聯潮後，會員大減，早前仲發聲明，話唔會用學聯嘅名義參加六四晚會，由各大學學生會代表自行決定是否參加，尋日，包括中大、嶺南、科大同樹仁四間大學代表透露會參加晚會，雖然仲有四間大學學生團體支持，但都有兩間大學柴台呢。
講緊嘅係港大同浸大學生會，港大早前已話唔會參加維園嘅六四晚會，將自行舉辦悼念活動，同樣退聯嘅浸大都係咁諗，熱血公民又事先聲明繼續自搞晚會，所以周四晚最少有四個同類活動。俗語都有話，多隻香爐多隻鬼，晚會愈搞愈多，實會分薄支持者，籌款當然會少，連鎖效應真係唔到你唔驚。
講到尾，專上學界大分裂係支聯會困局嘅源頭，但學聯需為領導佔領行動失敗負責，但喺佔領行動中，支聯會嘅負責人同樣有關鍵角色，都係始作俑者噃。依家學聯秘書長羅冠聰愈嚟愈似寡頭司令，支聯會主席「AV仁」何俊仁一樣唔好過，佢嘅議會表現同近期白鴿黨內嘅分裂消息，令好多泛民支持者都心淡，有人話AV仁係支聯會嘅負資產。雙方失勢，搞到今年嘅六四晚會都畀人看淡，認為可能係二十六年來參加者最少嘅一次。
