重拾好客之道 勝過著數行動

呢，由於激進組織不斷趕客，加上其他因素，本港旅遊零售業面臨內憂外患，形勢嚴峻，業界為咗救亡，早排發起「開心著數大行動」。經過一輪催谷，日前行動告一段落，埋單計數，成績聽講唔錯喎。主辦單位係咁講嘅，參與商戶多達一萬六千間，有啲銷售額按年錄得約一成升幅，大部分都話會繼續參與類似活動。而旅發局亦再接再厲，下月斥資八千萬元舉行「香港FUN享夏日禮」，推出各種優惠，目前已獲七十幾間酒店響應。

又難怪今次活動咁受歡迎嘅，一蚊鮑魚，半價珠寶，六折主題公園套票……聽落都幾吸引。之不過咁，一味靠呢啲活動催谷，始終唔係長遠之計，最怕一節淡三墟，優惠過後旅遊零售業又打回原形。老實講，如果唔係形勢嚴峻，根本唔需要靠割價吸引消費者，正如當年沙士過後市道蕭條，業界焗住要推出各種優惠一樣。

所以話，割價吸客唔係話唔好，但最多只有短暫刺激作用。就好似一個人氣虛體弱，五勞七傷，打補針或者可以吊住條命，但如果唔固本培元，點樣進補都係嘥氣嘅咋。

再講吖，以前香港就話係購物天堂，價廉物美啫，可惜時移勢易，今日已經冇呢支歌仔唱咯。好簡單，內地調低部分日用消費品進口關稅，分分鐘仲平過香港，加上自貿區遍地開花，購買進口貨愈來愈方便，內地人何必長途跋涉來港購物吖。最搞笑嘅係，港府要求內地將「一簽多行」改為「一周一行」，話就話要吸引高質素旅客，問題係，高質素旅客大把地方選擇，點解一定要來香港受氣呢？早排有內地企業豪擲逾億港元，請六千幾個員工去法國旅遊，連法國外長都要親自接見，咁嘅場面香港都幾難見得到。

講到底，出外旅遊最緊要開心，家陣香港七國咁亂，激進組織一時「驅蝗」，一時「光復」，香港由好客之都淪為趕客之都，係人都怕咗你喇。最怕高質素旅客吸引唔到，連低質素旅客都冇埋，到時就真係要食自己喇。

始終都係古人講得啱，治病必求於本。要重振旅遊業，最緊要係提升香港本身嘅吸引力，除咗增加旅遊設施，更加要重拾好客之道，否則，無論舉辦乜嘢推廣活動，都係治標不治本嘅咋，叮！