大搜查：肥亨講創業 自爆無經驗
商務及經濟發展局前局長「肥亨」馬時亨同香港青年聯會（青聯）主席霍啟剛尋日獲香港貿易發展局邀請，同市民分享創業心得。但肥亨就話主辦單位請錯人，事關佢無創過業，只係間接投資過連鎖壽司店，同間接幫女兒創立德育學校，佢仲笑笑口話同場嘅啟剛一樣無創業經驗，只會「開枝散葉」，認真幽默。
馬時亨（右）同霍啟剛（左）分享心得。
身為財金界猛人，肥亨對做生意都有一番見解。佢話創業最重要係了解市場需要，做好市場調查。佢又力銷大女創辦嘅德育學校，盛讚大女知道市場需要，又有抱負，唔單止為做生意，更加要培養未來領袖。肥亨咁樣讚法，搞到啟剛都話好有興趣，仲話要幫囝囝報名添！至於創業心得，身兼港協暨奧委會副秘書長嘅啟剛就話睇好國內體育市場，相信好快可以媲美美國體育市場模式，叫大家把握機會喎。
