大搜查：慧妍雅集 訪西安學惜水
「慧妍雅集」最近獲「心連大地攝影會」邀請，將喺十二月舉行慈善攝影展，希望籌得二百萬港元善款，用以改善內地西安天水嘅水源問題。
唐麗球（後排右三）往西安天水等地視察咗八日。
「波波」唐麗球早前隨主席王愛倫、會長陳法蓉等往西安天水等地視察八日，令佢感受甚深。佢傷感地說︰「原來當地屬黃土高原，降雨量少又唔集中，幾條村只有一口水井，但井水並唔流動，於是村民以沙自製過濾器過濾井水食用，因此當地食水係異常珍貴。記得曾家訪當地一名男村民，佢每日都要徒步近半句鐘到水井擔兩桶水，風雨不改。於是我問佢幾多日沖一次涼，佢竟然答我係『兩年一次』，因為啲水係用嚟煮飯同飲用，我聽到後好難想像，難怪啲小朋友外觀有欠乾淨！」
期間，波波等人獲邀試飲已煲過嘅井水，佢笑說︰「嗰啲水鹹鹹哋，飲完都唔知腸胃會唔會習慣，有啲人只淺嘗少許，但我就一飲而盡，哈哈！」不過，佢話返港後亦會同囡囡分享此行嘅所見所聞，從而教導囡囡要珍惜食水。
