大搜查：黃鴨登「陸」 變色會友
尋日喺一個玩具設計比賽頒獎禮上，一班名人工業家齊齊回憶起童年玩具。六十年前創造香港第一隻黃色膠鴨仔嘅工業家林亮，雖然年屆九十歲，但仍然清楚記得童年玩具。佢話細個無錢買玩具，會自己動手做，最喜歡用兩支竹枝整成吹槍，再用紙巾做子彈，可以玩好耐。
林亮特別製作一批金色鴨仔鎖匙扣送贈好友。
蘇家碧話細個會攞人哋門口香爐嘅香腳整公仔玩。
顏吳餘英（右）細個玩畫紙同橡筋繩，而顏志永（左）就玩屋企製造嘅車仔。
講到點解長大後會從事玩具行業，林亮話生產玩具係佢童年夢想，當年佢返內地讀書遇上日軍侵華，佢阿媽話日本出產玩具致富，令日本政府好有錢可以製造好多飛機大炮，於是佢決心生產玩具，更加喺一九四八年做咗第一隻黃色膠鴨仔。眨眼間，黃色膠鴨仔已經六十幾歲，林亮就特別製作一批金色同銀色鴨仔鎖匙扣送贈畀好友做紀念。
顏志永捐獻惠貧窮家庭
至於家族經營玩具生意嘅百仁基金副主席Roger顏志永就話，出世時屋企已從事製造玩具車生意，佢根本「無得揀」，由於家姐同妹妹都唔玩車仔，所以唔會爭嘢玩。佢又覺得玩具對小朋友發展好重要，所以平時會捐玩具畀貧窮家庭。Roger嘅媽咪顏吳餘英就話細個只係玩畫紙同橡筋繩。
工業總會主席Stanley劉展灝都話細個無錢買玩具，最鍾意玩荷蘭水蓋，即係壓扁嘅汽水蓋。至於工總行政總裁Linda蘇家碧細個就經常去攞人哋門口香爐嘅香腳整公仔玩。工總主席會喺七月二十八日換屆，Linda亦會過檔港鐵做公司事務總監。Linda話多謝Stanley知遇之恩，所以會做到Stanley卸任，九月先返新工。
