政壇：搞搞政：唔跟隊上深圳 泛民分裂內訌
包括十五名泛民主派立法會議員在內，合共五十六名議員將喺周日上深圳見京官討論政改，但泛民未起行先爆內訌。新民主同盟范國威同公文袋「阿毛」毛孟靜，唔知係咪驚唔跟大隊會曝光率大減，尋日無端端開記者會再重申一次點解唔上深圳，言語間仲寸爆泛民上深圳係「被召見」。
設計圖片及對白
阿毛話同意議員應把握最後機會傾政改，亦同意作為議員有責任同京官溝通，但就話政改係香港人、香港事，歡迎京官來港同佢哋傾，講法認真矛盾。佢又話今次屬於「被召見」性質，去到要遵守當地法律，例如唔可以着印有六四字樣嘅衫，係非常唔適當；而政府高官隨行更加係模糊化咗行政、立法關係，亦矮化咗立會，所以唔能夠接受，真係藉口多多。
范國威就話今次會面一定冇實質結果，反而會令泛民陷入兩難同墮入陷阱，令人覺得佢哋有可能被撬票同分化，所以佢就堅守崗位，肯定會否決方案，佢咁講擺明話啲泛民可能被分化。問到會唔會被公眾覺得泛民已四分五裂，阿毛承認要「三日一聯署」，大家嘅理念唔一定相同，且人各有志，但相信「殊途同歸」堅決否決方案。講到泛民上深圳就好似一定轉軚咁，莫非要好似佢咁原地踏步最好？
佢哋齊向泛民大撥冷水，但其他泛民好少理，喺「飯盒會」上繼續商議深圳嘅安排。阿毛嘅黨友「袋巾傑」梁家傑話，喺第一節會面中，佢哋經抽籤決定咗發言代表，分別係教育界葉建源、白鴿黨黃碧雲、工黨何秀蘭同佢。至於道具方面，佢話暫時只有代表泛民四塊板圖嘅四封信。會面後，三名京官、特首同政務司司長會召開記者會，泛民就會同步喺會場外接受訪問，實行各自表述立場。
