政壇：李大壯話台青識得感恩
愈嚟愈多年輕人不滿香港就業難、買樓難，開始視一岸之隔嘅台灣為樂土，唔少人仲心郁郁想移民台灣添！不過，熟悉兩地嘅港台商貿合作委員會（商合會）主席David李大壯就唔係咁諗，佢話年輕人好多都覺得「隔籬個西瓜靚啲」，但實情台灣生活亦唔見得好富裕，但佢哋懂得凡事感恩，抱有所謂「小確幸」、即係微小但確切幸福感嘅心態，唔知港青又有冇呢？
李大壯話台灣青年多抱有「小確幸」嘅心態，凡事感恩。
已出任商合會主席五年嘅David尋日推出五年工作報告，指港台兩地交往頻繁，舊年台灣訪港旅客逾二百萬人次，訪台港人亦衝破一百萬人次創新高。佢未來會研究開拓直航飛往台北松山機場。
講起港青鍾情台灣，David話其實台北市樓價佔收入比例全球最高，當糯米餅由以前十元台幣四塊，到依家十元台幣一塊都買唔到，台灣年輕人起薪點二十五年來仍然維持三萬元台幣，絕對唔係港青理想中咁美好。假如港青唔熟台灣「地氣」，要創業更係百上加斤。
