政壇：朱克伯格寄語 打機有前途

朱仔講緊嘅唔止係打機，而係寫Game。佢大概十歲時得到部電腦，由於佢超鍾意打機，打到想自己寫隻Game嚟玩，佢仲講到明，若無打機，肯定唔會去學寫程式；多得打機，佢先有興趣自學，佢仲話大部分佢識嘅世界頂尖電腦工程師，都係靠自學。

其實只要識得發揮，打機一樣前途無限。A股游族網絡嘅CEO林奇，細細個已經係「Game癡」，大個創業就決定做「自己最會玩的網遊」，公司成立咗六年就喺舊年內地主板上埋市。佢舊年身家已有五十億人仔。近排游族網絡股價係咁升，呢位80後嘅身家唔知又漲咗幾多。香港都有個90後「打機狂」鍾培生，中學時代轉賣Online Game嘅「武器寶物」已經賺咗十幾萬，大學畢業後放棄做投行，自己開公司轉播網絡遊戲同舉辦賽事，仲已經有創投基金注資。

無論林奇定鍾培生都話，齋靠打機唔夠，點都要顧埋學業，林奇仲話全靠老竇鬧佢「不好好學習，將來就只能去挖煤」，佢先識得發憤讀書。就算你係打機天才，無學識又點發揮？如果一心諗住望實個Mon打機就會成功，都係嗰句，諗多咗啦。