政壇：劉業強報名「繼位」唔墟冚

新界鄉議局主席劉皇發前日先去信局內全體議員同顧問，話自己年事已高，決定唔再競選連任，佢大仔劉業強尋日中午就急急腳去民政事務總署報名角逐主席一職。雖然有傳聞話發叔陸續約見二十七鄉嘅鄉頭，希望佢哋扶劉業強一把，但就尋日所見，只有數名鄉頭現身撐場，莫非其他鄉頭仲未消化到發叔退位嘅消息？

劉業強（前中）由多名鄉頭陪同報名角逐鄉議局主席一職。

陪同劉業強報名嘅有十幾人，出席嘅鄉事委員會主席包括沙頭角李冠洪、荃灣鍾偉平、錦田鄧賀年、厦村鄉鄧勵東、上水鄉侯志強、十八鄉梁福元，另有身兼大埔鄉嘅副主席張學明、林偉強同法律顧問林國昌等，人數真係唔算多。講起新界議題，外界普遍關注丁權，佢話依家仲考慮緊，睇吓有冇其他長遠政策替代。

對於發叔嘅身體狀況近日引嚟唔少猜測，劉業強承認爸爸係有啲唔舒服，但決定交棒畀佢唔係最近嘅事，而係經過多年考慮，再三強調唔係世襲。佢對執掌鄉議局有信心同抱負，希望為新界人服務，最近亦忙於打電話同親身拉票，成功獲得部分人支持。至於籌組新界黨，佢話選舉過後希望成功，日後要同委員詳談先可決定。