尋日立法會續會討論成立創新及科技局嘅決議案，主理創科局嘅商務及經濟發展局局長Greg蘇錦樑自然金睛火眼（目及）實進度。眼見光陰被虛耗，任憑「拉布」兩子點樣批評，甚至「大舊」陳偉業都話佢係啞巴，佢本人都學財爺鬍鬚曾咁，堅持封口唔開腔助長「拉布」，有乜嘢留番會後先喺社交網站發炮還擊。

設計圖片

會後批議員拖延內耗

社民連「長毛」梁國雄尋日朝早離港，拉布「三缺一」下得番人民力量「大舊」同「慢必」陳志全接力，所以佢哋喺四小時會議已六次點算人數，兼喺會議開始十八分鐘，即提出中止待續議案拖延時間。不過，無論建制定泛民都趁發言時間揶揄阿Greg嘅工作表現，剪布不成仲被人冷嘲熱諷冇機會反擊，阿Greg真係點滴在心頭。

紡織及製衣界議員Felix鍾國斌讚揚創新及科技諮詢委員會主席楊偉雄主動同唔同政黨會面，相反政府好多嘢唔同政黨傾。佢又引述阿Greg接受傳媒訪問時話，除咗處理立法會工作，「日日應酬十幾個署真係好攰」。Felix認為局長既然咁攰，「未來疑似（創科局）局長」又唔介意多做多點，「你不如畀人做多啲」好過喇！

大舊亦批評阿Greg喺佢哋提出中止待續議案時冇把握機會發言，「你中文唔好咪講英文囉，你喺加拿大咁耐」，仲揶揄佢係啞巴添。沉默多時嘅阿Greg喺會後兩個鐘終於要爆喇，批評「拉布」議員嘅政治生存空間係咪一定要建基於不斷拖延內耗，白白睇住機會送給香港嘅競爭對手呢？不過，講多無謂，「拉布」議員都唔會有興趣睇。

第一手消息請下載on.cc東網iPhone/iPad/Android/Windows Phone Apps