內地調低進口稅 香港旅業雪上霜

係咁嘅，內地將於下月一日起降低包括服裝、鞋靴、護膚品、紙尿片等日用品進口關稅稅率，平均降幅超過百分之五十。好似紙尿片咁，進口關稅由百分之七降至百分之二，護膚品就由百分之五降至百分之二，唔係得個講字。近年內地當局逐步降低進口關稅，涵蓋嘅貨品應有盡有，類似措施陸續有來，香港首當其衝，都幾難有運行。

係人都知，經過今次減稅，內地進口貨品價格同香港進一步拉近，有啲甚至仲平過香港添，內地人根本冇必要再山長水遠來香港購物。香港缺乏新旅遊景點，之所以能夠吸引咁多內地旅客購物，主要就係因為香港有免關稅嘅優勢。正如早排有金融機構調查發現，近八成內地客對香港嘅第一印象係購物天堂，其次係美食之都同美麗景色。所以話，日後香港連價廉物美嘅優勢都冇埋，對內地客失去吸引力，想搵人上門都幾難。

有人話，香港失去價廉物美嘅優勢，可以靠貨真價實吸引內地客啫。冇錯，內地品質管理令人缺乏信心，內地人先至會爭相來港購物，問題係，隨着內地不斷完善制度，加強監管，香港遲早連呢啲優勢都冇埋，到時仲可以靠乜嘢呢？再講喇，內地除咗調低進口稅，而且遍設自貿區，內地人購買進口貨愈來愈方便，仲使乜來香港吖。一葉知秋，舊年以來本港零售銷售額跌跌不休，就係一個嚴重嘅警號。

當然喇，香港旅遊及零售業步入寒冬，除咗因為競爭力不斷下跌，社會愈來愈政治化亦係主要原因，激進組織唯恐天下不亂，不斷上演「驅蝗」、「光復」、「鳩嗚」等鬧劇，搞到中港矛盾不斷惡化，連「一簽多行」都被迫改為「一周一行」，旅遊及零售業又點可能好景吖。呢，近日一宗無證兒童獲發行街紙嘅個案就搞到滿城風雨，雞犬不寧，激進組織逢中必反已經到咗走火入魔嘅地步，內地旅客仲唔避之則吉咩。

始終都係古人講得啱，禍福無門，惟人自招。香港向來以好客聞名，以購物天堂著稱，依家偏偏有人以趕客為己任，香港想唔死都幾難，叮！