政壇：搞搞政：民調甩漏多 葉劉受質疑
政改最快下月底交畀立法會表決，呢排各種民調出籠，新民黨尋日都公布政改民調，結果超過五成人支持。不過呢份問卷呢頭公布，嗰頭就被質疑，首先民調係喺街頭進行，唔符合全港隨機抽樣嘅原則，亦冇加權，同大家理解嘅民調係兩回事。
（設計圖片及對白）
新民黨主席葉劉淑儀（葉劉）死撐，好多民調都冇加權，又話大學民調話有加權都係「講個信字」喎！葉劉今年是非不斷，唔通真係年初被麒麟撞到，掂乜都有手尾？
呢個民調係上月二十七日至今個月八日，喺新民黨三十個地區樁腳，即港島、新界東及新界西，唔包括九龍東及九龍西進行街頭訪問。以街頭問卷訪問二千七百幾人，結果有五成三受訪者支持政改方案，僅有一成七受訪者反對。問到政改方案否決邊個要負責，答話泛民嘅有五成三，特區政府要負責有三成六，建制派有一成，但就冇「中央政府」選項，只得一個「其他」嘅選項。
由於係喺街頭做民調，冇加權，代表性及誤差會好大，葉劉承認民調有self-selection bias（自我選擇性偏差），又話民調都有偏差，唔係絕對準確，只係作參考之用喎！跟住又話英國大選嘅選前民調都同結果差好遠喇，至於問卷唔加入「中央政府」選項，葉劉竟然話，其他民調已經問過呢個選項，「睇吓有冇人自己講『中央』」。
理工大學社會政策研究中心主任鍾劍華就話，新民黨民調搵自己樁腳做民調，若果唔係隨機抽樣，就算加權都不足以反映實況，所以「代表性好低」。葉劉今鋪真係吃力不討好囉。
