政壇：郭琳廣撐早研小巴加位
小巴係咪加座位眾說紛紜，加唔加﹖加到二十個位定係二十四位都有人提，交通諮詢委員會尋日聽取政府報告嘅初步探討，支持政府委託獨立顧問深入研究有關議題。交諮會主席郭琳廣更話，有批評研究時間太長，佢都同意呢項研究宜早不宜遲。
郭琳廣話同意小巴加位研究宜早不宜遲。（資料圖片）
按照計劃，呢個議題將於今年中，喺《公共交通策略研究》下的《角色定位檢視》中展開研究，需時約兩年，到時才決定係咪可取。
郭琳廣話，依家支持同反對嘅人都有，研究真係應該快啲做，以回應大家嘅關注。
另外，交諮會轄下嘅交通投訴組今年第一季共接獲五千一百四十二宗投訴及建議，雖然整體投訴數字下降，但今年首季有關公共小巴服務的投訴及建議多達八百七十四宗，較去年同季上升近一成一，而季內鐵路服務的投訴及建議亦達一百六十一宗，比去年同季一百一十四宗增加四成。
