政壇：港星小股東 兩地大不同

置富產業信託行政總裁趙宇話，隻房託喺港星雙邊上市，為咗要照顧兩地股東，所以每年嘅股東大會都要輪住搞。佢發現，雖然股東都有唔少年紀大嘅人，但新加坡嗰邊啲婆婆伯伯非常團結，會夾錢請一啲退咗休嘅投行人同會計，一齊出席股東會，去幫手問到篤，全程就攞住本年報係咁問係咁問。管理層為免被考起，好多時都會請埋核數師一齊出席撐住。

趙宇仲話，有一次點票點咗三粒鐘，啲公公婆婆就留喺酒店三粒鐘咁等。但香港呢邊啲股東就似乎好唔耐煩，好多時香港股東都係求攞張餅卡就走人。新加坡股東嘅認真，真係值得學習喎。