政壇：李朝旺股東會大派紙巾
天氣差，唔少活動都受影響，不過，尋日上市公司維達舉行股東會，黃雨都驅不走小股東嘅熱情，主席李朝旺更加好開心，完全冇受黑雨、黃雨影響，只見佢執到正，好精神咁帶埋大把禮品同小股東分享喜悅。
維達季績佳，主席李朝旺容光煥發出席股東會。
維達季績唔錯，一眾高層全程都笑容滿面，小股東一樣開心無比，皆因維達豪送贈品，一個個紙袋嘅紙巾任攞，隨你一個人兩隻手攞得幾多就幾多。我哋就見到有小股東好捧場，仲一個人攞咗十一袋嘅維達贈品，同佢傾番兩句，先知維達招股嗰陣，佢就已經買入維達股票，係忠實擁躉，至於尋日一手攞成十一袋禮物，佢就話係「幫朋友攞」嘅。
