政壇：譚志源寸佳叔亂咁噏
政改去到關鍵時刻，政圈有心人紛紛出動，有啲想傳遞訊息，有啲就負責放風測試水溫，身兼全國政協委員嘅中央政策組前首席顧問劉兆佳（佳叔）近排好多嘢講，弊在倒米居多，譬如佢早前話港人普選嘅特首，其實都係參考材料，就搞到唔少人皺晒眉頭，政制及內地事務局局長譚志源尋日就寸爆佳叔，講白啲，就係佳叔已唔係政府中人，亦唔係基本法委員，個人意見只代表個人，大家明喇？
（設計圖片及對白）
佳叔有嘢講，本來冇乜嘢，弊在尋日立法會一個討論政改嘅小組委員會舉行會議，泛民議員引述佢嘅說話質問譚志源，搞到譚志源有啲晦氣。平時譚志源被問及同樣問題時，通常都係話政府唔評論個別人士言論。
不過，尋日譚志源就忽然認真，仲剖析佢同佳叔嘅淵源添，佢話佳叔「以前係我老細」，但現時佢唔係政府官員，又唔係基本法委員會委員，更加唔係中央官員，所以佢講嘅嘢只係代表個人意見，當然唔係官方立場啦。講到最後，佢仲有啲無奈咁話，佳叔「鍾意點講就點講」，講到咁，真係不滿盡現啦。
大舊測試譚耀宗底線
譚志源呢頭寸爆佳叔，會上另一位議員陳偉業（大舊）就寸爆小組委員會主席譚耀宗。大舊發言時突然爆出一句「你阿媽」，仲問譚耀宗到底呢句係咪粗口，測試佢底線。譚耀宗都唔敢直接裁決呢句說話違規，惟有叫大舊發言時唔好離題，但大舊繼續爆多幾句「你阿媽」，譚耀宗都冇晒佢符，結果兩人一人一句糾纏咗近四分鐘，大舊因為發言時間結束先冇再嘈落去。雖然今次譚耀宗冇裁決「你阿媽」係咪違規，但相信第日陸續有人以不同字眼測試佢底線。
