郵件雲遊港九 郵政魂遊太虛

呢，話口未完又出事喇。有一百封分別寄去大埔一間中學、一間小學同社區中心嘅郵件，遊遍九龍新界，首先由九龍灣中央郵件中心分派到大埔派遞局，點知派遞局將郵袋打回頭，搞到一度鬧出遺失郵袋驚魂，直到中央郵件中心職員發現，先至將郵袋送番去大埔派遞局，就咁一來一回，費時失事，搞到第二日至全部派完。

地址唔啱、郵資不足打回頭就聽得多啫，郵件畀郵局內部打回頭，仲有冇再離譜啲吖？好彩呢批郵件冇失蹤咋，否則仲大件事吖。聽吓香港郵政點解畫，佢哋承認有員工疏忽，又話已經就事件向收件人致歉，話會提醒員工以後小心處理喎。

咪以為今次係小事吖。正如地區人士話齋，郵件延誤後果可大可小，唔係一句人為疏忽就可以當冇事發生o架。

話時話，香港郵政醜聞多多，又點止派信變雲遊咁簡單吖。淨係「失信於民」事件，已經一匹布咁長。今個月之嘛，有郵差喺屯門派遞期間懷疑遺失郵袋，報警求助，結果居然喺郵車上搵番，真係唔到你唔服。有立法會議員就講得啱嘞，郵政服務不斷插水，講到尾都係因為合約員工太多，員工同工不同酬，士氣低落，做嘢求求其其，有乜法子唔甩甩漏漏吖。

冇錯嘞，香港郵政經營不善，年年虧損，淨係過去兩個財政年度已經蝕咗過億元，面對呢個困局，郵政官僚唔係諗辦法改善服務，反而一味諗縮數，人手裁得就裁，時間縮得就縮，郵局摺得就摺。最好笑嘅係，署方○八年煞有介事，花費數百萬元聘請洋顧問，話要研究改革方案喎，結果之後一句內容唔達標，拒納意見不特止，連顧問費都想賴帳，你話係咪笑話吖！

經營不善都算嘞，最離譜係香港郵政充當政治打手，滋擾正義傳媒，事件拖足半年至完成調查，點知賴得就賴，藉口多多，甚至連道歉都冇句，簡直豈有此理！

講多無謂，食多會滯。郵政官僚魂遊太虛，與其浪費公帑，添煩添亂，不如通通掃地出門，起碼可以幫納稅人節省資源吖，係咪！