城中鏡：鍾國斌奇招保功能界別
近日政界有人建議特首提名委員會公司票變個人票，但紡織及製衣界立法會議員鍾國斌（Felix）就話，公司票轉董事票就有共識，但轉個人票就要循序漸進處理喎。講講吓，Felix就辣到功能界別，話假設政改方案獲通過，二○年就會普選立法會，屆時都要處理功能界別點樣改革，包括討論擴闊選民基礎，所以現屆政府開始討論都啱喇。泛民主派一直要取消功能界別，Felix咁講算唔算係「暗度陳倉」呢？
鍾國斌借修改提委會保留功能界別。（資料圖片）
Felix本月初就向業界發出二千八百多份問卷，收回三百三十二份，當中近七成六人支持、逾兩成一反對政改方案，仲列出支持同反對嘅具體意見添，支持嘅意見包括「增加選委會人數更好，能有多一點認受性」，而反對意見就有「重啟政改程序」、「拒絕袋住先」等。Felix又話，雖然京官話冇空間修改政改方案，但佢覺得仲有空間喎。
