城中鏡：Jack蘇笑別貿發局
服務咗香港貿易發展局十五年嘅主席蘇澤光（Jack蘇）月底離任，過檔做機場管理局主席。臨別依依，貿發局尋晚喺灣仔會展舉行大型歡送會。Jack蘇相識滿天下，城中政商界名人好友同貿發局一眾理事會成員，都現身捧場。Jack蘇開心到好似做新郎哥咁，笑足全晚。正當歡送會舉行期間，政府就夾啱出稿正式任命Jack蘇做機管局主席，任期三年。
馬時亨（左）見到「波友」蘇澤光（右二），熱情地上前握手問好。
蘇澤光（右二）逐一與貿發局理事會成員擁抱道別。
陳南祿話日後仲有大把機會喺公職上見到好友蘇澤光，唔會咁快送餞別禮。
歡送會「人山人海」，包括新世界發展主席鄭家純、中華總商會榮譽會長蔡冠深、協成行董事總經理方文雄、恒隆地產董事總經理陳南祿等，嘉賓多達七百幾人，當中唔少係Jack蘇嘅高爾夫球波友，商務及經濟發展局前局長馬時亨（肥亨）就係其中一位，問佢送乜賀禮畀老友，肥亨就笑笑口咁話：「我平時打波輸咗唔少，已經送咗好多錢畀佢（Jack蘇），今晚一於嚟拎番」。
同事拍「催淚短片」
老友們講心，無預備餞別禮，不過Jack蘇嘅同事，就預先拍好一條「催淚短片」，搵來資深同事及Jack蘇嘅好友講吓感受，句句溫馨，催淚度十足。貿發局總裁方舜文都送上精美相簿，貼滿Jack蘇喺局內工作嘅舊照。
咁多老友畀面，Jack蘇都上台講番幾句答謝大家，謙稱喺貿發局只係「過來人」，多得局方上下同事幫手，又形容呢十五年工作生涯，係人生最開心嘅時光。六月一日，佢將過檔機管局擔任主席，佢話預咗上任頭炮係籌備興建第三條機場跑道，要處理環保、航道及融資安排，挑戰唔少。
