談判桌上最重視機密，政圈亦好忌竊聽或偷錄事件。但希臘近日就爆出一單偷錄事件，事源新政府同國際債權人嘅援助談判多月來陷入膠着，早前有傳負責嘅大旗手財長瓦魯法基斯權力被架空，但佢可能不甘寂寞，日前向《紐約時報》爆響口，話自己喺上月談判會議之中偷偷錄音，但可惜因保密理由唔公開得。

會議講明要保密，但主事者竟然偷錄，難怪佢自爆之後，批評如潮而來。

查實經濟學者出身嘅瓦魯法基斯出晒名言行惹火，佢鍾意揸電單車返工，官式出訪歐洲多國時，連西裝都唔披，直頭着皮褸同鮮色恤衫，結果畀人話似二手車Sales同夜總會侍應！不過，佢呢種作風，國民超Like勁支持，單係Twitter就有超過40萬粉絲。佢究竟係輕率？定膽大唔識死？

第一手消息請下載on.cc東網iPhone/iPad/Android/Windows Phone Apps