政壇：中出傳撐自己友接棒象哥
立法會明年舉行選舉，中華出入口商會（中出）嘅進出口界功能界別都會換人，現任進出口界議員黃定光（象哥）多次講過將會退位讓賢，而有機會接棒嘅就包括中出副秘書長許華傑（Michael）同民建聯副主席周浩鼎（Holden），之前有傳Holden獲象哥屬意，最近形勢似乎有變，因為Michael獲得會內兄弟及叔父輩支持，且有望出線。
中出副秘書長 許華傑
上屆已有聲音話，象哥交棒的話，接棒人係前界別議員許長青之子Michael，結果象哥再坐一屆，依家一班兄弟就想推舉Michael接棒，覺得佢已經「沉默咗咁耐」。另有會員認為，Michael資歷較Holden深，喺商界亦有一定人脈，對會務發展應較有利。
我哋當然問Michael點睇接棒傳聞，佢話現時做好會務工作先，講其他嘢都係言之尚早喎。至於選情忽然插水嘅Holden，亦有傳聞話佢忽然想出戰超級議席，莫非同中出方面嘅新形勢有關？
