政壇：郭家麒惡人先告狀
本報昨日揭發立法會議員郭家麒同四名助理，以板車運送發電機進入立法會大樓，當保安要求檢查發電機內是否存有電油時，郭家麒同助理拒絕配合，有閉路電視錄影截圖作證，事後仲被發現有人將電油倒入坐廁。呢單議員公然運送危險品入立會大樓嘅事件被揭後，郭家麒唔道歉之餘，仲連同黨友陳家洛「惡人先告狀」，去信立法會主席曾鈺成同私隱專員公署，要求徹查立法會閉路電視錄影截圖外洩喎。
郭家麒唔明點解會有讀者提供與傳媒刊登，又話所有罪名都係「莫須有」，係製造白色恐怖。陳家洛都幫手喊驚，批評秘書處「不謹慎」、做事唔經大腦，令閉路電視錄影截圖外洩。
黃定光諷「若要人不知」
議會中人對事件好關心，行管會成員黃定光就質疑有人欠常識，竟將輕過水嘅電油倒落坐廁，進入下水道後有機會流入坑渠，遇到靜電同火花會爆炸，若同坑渠積聚嘅沼氣混合，後果更不堪設想。至於閉路電視錄影被截圖，並發放予傳媒是否恰當，黃定光反問「有咩唔恰當呢？」又稱「若要人不知，除非己莫為」。
眾所周知，電油屬易燃物品，理應不可帶入立法會，加上民主黨議員胡志偉亦曾經因為喺大樓啟動柴油發電機，釋出陣陣濃烈臭味而令人誤以為火燭，可惜泛民議員未有吸取教訓。理工大學機械工程學系工程師盧覺強話，若將電油倒落坐廁，馬桶殘留的電油一接觸火種，就會瞬間形成火球，附近嘅人有機會被嚴重燒傷。睇嚟，議會中人應該投訴郭家麒等涉嫌攞人命較飛就真！
