無證兒童知多少 執法部門進退難

有位十二歲嘅無證男童，喺內地出世時被父母遺棄，居住香港嘅婆婆託深圳友人代為照顧，後來以雙程證接嚟香港同住。由於男童既冇出世紙，又冇行街紙，作為無證兒童，終日提心吊膽，冇書讀不特止，有病都唔敢睇醫生，甚至日頭都唔敢出街，見到警察就要掉頭走。婆婆上個月睇到外籍無證少女墮樓身亡嘅新聞，擔心自己孫兒步佢後塵，於是向入境處自首，仲話已經有心理準備面對懲罰喎。雖然男童尋日終於獲發行街紙，暫時唔使再擔驚受怕，但婆婆就因為教唆他人逾期居留而被捕，認真無奈。

呢位無證兒童嘅遭遇，的確令人同情。小朋友原本應該有個無憂無慮嘅童年，家陣連接受教育嘅基本權利都被剝奪，你話係咪無辜吖。協助佢嘅立法會議員希望港府基於人道立場酌情處理，盡快解決小朋友讀書問題，甚至畀佢香港居民身份。

冇錯，法律不外乎人情，呢個道理大家都明，畢竟人心肉做，邊個忍心睇住一位兒童繼續受苦吖。不過話又講番轉頭，如果今次破例特赦，可能會向外界發放錯誤訊息，變相鼓勵其他人倣效，特別係家陣假難民絡繹不絕，盞添煩添亂嘅咋。所以話，當局特赦又難，唔特赦又難，進退維谷，都咪話唔頭痕。

太一叮唔係杞人憂天o架，入境處數字顯示，回歸至今年三月底，超過五百宗嬰兒出生滿一年先至辦理出生登記嘅個案，唔好忘記，呢啲只係有案可查嘅數字，仲有其他偷渡來港或者逾期居留嘅個案，當局一無所知，呢類「隱蔽人口」究竟有幾多，真係冇人話得埋。最大鑊嘅係，即使有案可查，入境處都跟進唔切。好似外籍無證少女單畸士咁，據講入境處曾發信要求死者父親辦理證件，最後居然不了了之，卒之釀成慘劇。

點講都好，家陣問題擺喺度，當局始終都要正視。大家應該記得，回歸初期大批無證兒童滯港，淨係讀書問題已經引發極大爭議，今時今日社會泛政治化，中港矛盾比當年嚴重得多，如果港府處理不當，分分鐘激化矛盾o架，叮！