城中鏡：陳婉珊做女強人有優勢
LME亞洲年會曲終人散，尋日主辦單位就邀請咗利記行政總裁Clara陳婉珊講親身經歷。Clara話做金屬嘅家族生意利記喺一九四七年成立，自己係家族第四代，生長喺一個極傳統家庭，依家凡大時大節佢哋要跪低向老人家敬茶。
陳婉珊
Clara喺澳洲同加拿大畢業後，九五年加入公司，回顧番呢二十年生涯，一啲都唔容易。初期乜都要學，仲要落手落腳做，連與同事相處都有難度，客戶同供應商又唔信佢，直接搵佢爸爸傾。佢話最緊要就係堅持唔放棄，同埋要畀出想知想學嘅決心。直到○六年帶住公司上市，公司由最初三十人增加到依家二百人，啲員工開始對佢改觀。
喺呢個男人主導行業嘅工作世界，Clara原來亦有優勢：就係公司遇上有乜爭拗，女人出面會較易處理，而且有佢在場，啲男士唔會講粗口。
