城中鏡：陳裕光交棒有道
接掌家族製衣生意多年嘅香港青聯副秘書長Maya林玉茵早前搞咗個傳承之道研討會，唔少青聯兄弟姊妹齊分享。身兼傳承學院榮譽主席嘅大家樂主席Michael陳裕光話，中國人仍有重男輕女觀念，有企業家寧願交棒畀只有十幾歲嘅兒子，都唔肯畀女兒接手，佢認為應及早打破呢種偏見。
陳裕光（右）同Eric Landolt齊分享企業傳承之道。
林玉茵不時被媽媽梁寶珠捉住晚上開會。
青聯會董陳恩栢（右起）、副主席錢國強、會員梁曉峰同常董吳嘉汶齊交流接棒心得。
林玉茵感激媽咪嚴厲
當日Michael同投資銀行高層Eric Landolt齊去做講者。Michael話中國人交棒意識比起歐洲及亞洲其他國家顯得好落後，唔少企業家思想保守，唔想早啲做好接班安排，一旦發生意外或患病，想搵人交棒都嚟唔切。
Maya分享接棒經歷時話，做過保良局主席嘅媽媽梁寶珠鼓勵佢畢業後先喺外面工作幾年，於是佢加入某國際品牌珠寶部，原打算返一個月工體驗吓就走，點知一做幾年，仲升咗做總監。佢笑稱因為太愛珠寶，唔捨得辭工，所以依家要用盡時間。雖然佢身兼兩職，但媽咪無因此錫住佢，有時夜晚九點諗起有工作想傾，照打電話畀個女開會喎。
中華總商會青年委員會副主席林智彬直言自己較幸運，由爸爸福建社團聯會永遠名譽會長林銘森手上接下家族玩具生意，算係無風無浪。佢話爸爸好開明，兩父子乜都傾。
