政壇：泛民賴貓破壞協調機制

尋日立法會繼續表決預算案餘下嘅三百九十幾項修正案，會議一開始，人民力量陳志全就要求點人數，嘥咗八分鐘先齊人。之後雖然無人再藉點人數拖延時間，但主席曾鈺成就要不停響鐘點人數，原因係議事廳內經常差兩至三人先可表決，會議開始僅僅三個鐘，就已經響鐘近十次，拖慢晒表決程序。

曾鈺成批評，有啲人連趕返議事廳投票都費事，促請議員顧及公眾形象。建制派好勞氣，建仔主席李慧琼批評話，該黨議員都「坐定定」，相反泛民只有五至六人喺議事廳內，認為佢哋需要為現況負責，仲話議員有責任令會議順利進行，拉布嘅議員浪費時間。

李慧琼嘅黨友葉國謙就話已向飯盒會召集人「袋巾傑」梁家傑表達不滿，要求佢哋遵守早前協調嘅機制。但泛民一於少理，袋巾傑更係「今日的我打倒昨日的我」，話機制純屬知會性質，唔認係協調喎。