再有立法會議員助理涉嫌違規帶入易燃物品。我哋收到風,尋日下晝約四時半,公文袋議員郭家麒嘅四名助理以板車運送一部發電機入立會,遭保安截停查問。眾人理論期間,郭家麒趕到現場,唔理保安勸阻下自行帶走四人及發電機。

立法會閉路電視錄得有人搬發電機上樓。

郭家麒

據聞,當時保安懷疑發電機內存有電油,故要求四人打開發電機檢查,但四人唔肯配合,更致電郭家麒求助。保安惟有到八樓郭嘅辦事處查看,聞到廁所傳來濃烈電油氣味,估計佢哋已將發電機內電油倒入馬桶內。

郭家麒接受查詢時指,助理搬入嘅係全新嘅發電機,認為立會保安刻意留難。但佢承認發電機內可能存有少量電油,因為買部新機時要用油測試,可能仲剩番少少喺機底。佢批評有人故意將件事無限放大,仲辯稱若唔畀攜帶電油入立會,係咪停車場所有車都唔畀入喎。

立會秘書處得悉事件後認為事態嚴重,已發通告提醒議員不得帶入易燃物品,立會行政管理委員會亦會跟進討論有關事宜。

第一手消息請下載on.cc東網iPhone/iPad/Android/Windows Phone Apps