支聯會將就六四事件舉行悼念活動,但今年面對嘅形勢特別緊張,事關隨着本土派崛起,各種挑戰接踵而至。有人批評六四晚會只係行禮如儀兼唱K,熱血公民更揚言會另起爐灶,落齊十八區搞晚會,加上學聯早前以院校未達成共識為由,宣布唔參與六四晚會,係二十六年嚟首次,內憂外患,真係屋漏兼逢連夜雨。唔知係咪因為咁,支聯會特別出版小冊子,回應本土派同年輕一輩對六四晚會嘅質疑,仲強調晚會都係「本土運動」,試圖重新包裝晚會以求吸客。支聯會新任主席「AV仁」何俊仁尋日公布月底大遊行同六四晚會詳情,一如所料遊行終點由以往嘅政府總部改為中聯辦,亦會喺中聯辦外繫上黃絲帶。至於六四晚會,亦一如既往晚上八點開波,晚會內容預計亦唔會有大變動。

(設計圖片及對白)

但學聯今年將缺席晚會,分分鐘冇年輕代表上台發言。AV仁就話已發帖廣邀所有大專院校嘅學生會參與,至少三間院校已答應,另外有幾間院校仲諗緊,只有港大學生會表明缺席,相信屆時會有院校代表取替學聯上台發言嘅。

唔認唱K哭喪

面對本土派狙擊六四晚會,恥笑晚會係「唱K哭喪」,AV仁死撐話六四晚會彰顯重要嘅核心價值,係一場利用群眾力量嘅「本土運動」,就算晚會內容同內地有關,亦只有喺香港先發揮到動力,台灣都冇咁多人有呢種感情咁話。

不過,AV仁唔肯預計今年會有幾多人參與,只係話人數每年都有高有低,「有熱、有冷卻嘅時候」喎。無他嘅,被指「大中華」嘅六四晚會都要扮本土吸客,真係時移勢易。

第一手消息請下載on.cc東網iPhone/iPad/Android/Windows Phone Apps