國泰工潮成常態 禍及乘客最無奈

大家冇聽錯，國泰又發生勞資糾紛，尋日有過百名空服員喺機場通宵靜坐抗議添。工會主席係咁講嘅，資方公布今年平均加薪百分之四點五後，居然提出多項剝削員工福利嘅措施，包括大幅削減外站津貼、員工續簽長約時同工不同酬及竄改部分內部營運守則，批評資方「明加實減」，而且令員工失去法律保障，如果公司今日限期前仲唔處理事件，唔排除八月發起大罷工。

資方究竟點講呢？佢哋話喎，員工改簽長約時會調升時薪，增幅達雙位數字；而同工不同酬係因為每年都有好多新人加入，薪酬調整需設截止日期；至於艙務員嘅津貼，公司會定期檢視，亦會調高工會關注嘅外站津貼。發言人仲話，公司對員工嘅法律支援不變，大家只係一場誤會喎。

正所謂，公說公有理，婆說婆有理，外人好難判斷誰是誰非，最緊要唔好影響航班運作，損害乘客利益，否則，就算幾有理由，都好難得到市民諒解同支持。大家都知，八月唔止係旅遊旺季咁簡單，仲係莘莘學子參加遊學團回港嘅高峰期，加上唔少留學生趕去外國開學，機位需求極大，偏偏呢個時候搞罷工，真係好大鑊o架。正如旅遊業議會話齋，國泰係本港業界龍頭，佔整體機位三至四成，一旦罷工，對本港出入境行程安排影響極大。而勞福局局長張建宗就呼籲雙方保持克制，盡快解決分歧喎。

話時話，國泰工潮都唔係第一次嘅喇，幾乎周期性發作，而且次次撞正旅遊旺季，都咪話唔令人討厭。呢，三年前嘅聖誕節前夕，員工因為「跨站飛行」及「通宵更」問題同資方傾唔掂數，搞到要罷工咁滯，直到最後一刻資方讓步，工潮先至平息。而近年零星工潮不斷，幾乎成為家常便飯，去年底就有機師發動按章工作。你話嘞，乘客次次都成為受害者，係咪無辜吖。

即係咁，香港作為國際航空樞紐，空服員郁啲就罷工，影響乘客事小，損害香港形象事大。再講吖，家陣旅遊業已經步入寒冬，再咁搞法，盞衰多兩錢重嘅咋。點都好喇，唔該勞資雙方好好坐低溝通，勞工處亦唔好袖手旁觀，盡快四四六六拆掂佢吖，叮！