城中鏡：護髮有辦法
尋日喺一個社團酒會上遇到「玩具大王」蔡志明，見佢嘅頭髮濃密有光澤，問佢有乜保養秘訣？佢笑笑口話係遺傳咗媽媽嘅好基因，加上佢兩日先洗一次頭，所以咪有咁好成果囉！點解兩日先洗一次頭？佢解釋話因為如果日日洗，就好似日日洗衫一樣，好容易甩色，咁咪冇晒光澤囉！佢身旁嘅中華廠商會聯合會副會長吳宏斌聽完都忍唔住大讚，仲話好羨慕喎。
蔡志明（右）頭髮又多又有光澤，吳宏斌羨慕不已。
胡法光（前）喺兒子胡曉明陪伴下，難得公開露面。
趙國雄教年輕人黐住父母住多幾年，直至儲夠首期置業。
趙樓神當年搵二千儲千幾
轉頭見到長實執行董事「趙樓神」趙國雄，佢話明白依家年輕人好難儲錢買樓，想當年佢月薪只得二千元，每月可以儲千幾元。佢建議後生仔可以黐住阿媽住多幾年，等儲夠首期後再諗買樓。「電梯大王」菱電集團創辦人胡法光同兒子Herman胡曉明都有到場，記得Herman曾經話祖先係山西人，但係佢同父親喺香港社交界都係以江蘇無錫人自居，事關佢哋先人輾轉遷徙到江蘇，胡家祖墳就喺江蘇無錫。
講講吓，Herman突然百無禁忌話，佢哋全家都喺無錫買咗墓地，雖然有生之年好少返鄉下，但係終有一日會落葉歸根，估唔到佢對生死觀念睇得咁開。自從中信泰富「爆煲」以後，極少出現公開場合嘅中信泰富前主席榮智健都有到場，佢話依家過住半退休生活，得閒打吓高爾夫球，咁有冇留意香港政治和股市呢？佢笑稱：「少少啦！」咁有冇留意最近股市大漲，但係中信股價仍然升唔上來？佢即尷尬話，冇留意喎。
