政壇：聞蛇齋餅糉拉票 英實習生震驚
泛民主派立法會議員經常被指勾結外國勢力，話口未完，尋日喺立會見到一名神秘外籍人士跟住會計界議員梁繼昌出出入入，細問之下，原來係佢新請嘅實習生Benedict Maguire。Benedict係英國自由民主黨黨員，打算喺二○二○年參選國會議員。講開選舉拉票，佢話英國通常都係搞籌款活動，好少會派禮物拉票，當佢聽到香港有蛇齋餅糉呢樣嘢時，就表現得好驚訝。
梁繼昌（左）請咗個只返三日工嘅英籍實習生Benedict Maguire（右）。
其實Benedict喺香港嘅實習生涯只有三日，尋日第一日返工，就去立會四處參觀，觀摩吓香港立法機關運作，之後就轉去澳洲實習。聽講佢嚟香港主要做辦公室工作，亦會睇吓同事嘅英文文法有冇錯，加上英國同香港嘅議會運作有啲相似，所以大家都會交換吓諗法。
