喺舊年佔領行動期間，泛民主派議員喺立法會發起不合作運動，更成功突襲負責審批政府撥款申請嘅工務及人事編制兩個小組委員會，取得兩個小組委員會控制權，又發起連串「拉布」，令政府多項工程撥款申請無法通過，間接令工程造價上升，將納稅人血汗錢倒落鹹水海。之不過，不合作運動似乎已有玩完嘅迹象，唔通泛民終於覺悟，明白不合作運動阻礙民生，驚流失選票？

設計圖片及對白

疑憂選情受影響

工務小組尋日開會審議六項政府工務工程撥款申請，包括興建西九龍政府合署、喺西九龍填海區重置食物環境衞生署辦事處同車房、屯門西北供水計劃，以及沙田廢物轉運站翻新及提升工程等，泛民唔止冇「拉布」，仲迅速通過多項撥款申請，工務小組主席「袋巾傑」梁家傑更主動提出延長會議十五分鐘，等議程上嘅所有議程都可以如期完成審議。結果尋日約兩小時會議，就通過咗合共六項撥款申請。

除咗工務小組外，泛民喺財務委員會亦疑似停止「拉布」。好似上周五審議入境事務處就研發新一代智能身份證提出嘅撥款申請，本來預咗泛民「拉布」，所以安排兩節合共兩小時會議。點知泛民並冇「拉布」，結果唔使一節會議就已經通過咗撥款申請，大家提早收工。

唔通泛民擔心再搞不合作運動會犯眾憎，影響今、明兩年區議會同立法會選舉選情？但佢哋就死撐話不合作運動係「贊成嘅就贊成，唔贊成嘅就不合作」，如果政府再提交啲佢哋唔贊成嘅申請上立法會，佢哋就會繼續不合作喎。真係贊唔贊成，乜都佢哋講晒！

第一手消息請下載on.cc東網iPhone/iPad/Android/Windows Phone Apps