取締僭建歎慢板 屋署官僚猶死撐
正所謂，民生無小事。雖然港府最近被政改爭拗搞到焦頭爛額，但唔代表可以忽視民生問題。好似屋宇署咁吖，早前被審計署踢爆處理僭建物歎慢板，搞到都市炸彈遍地開花，呢啲咪就係失職囉。
立法會政府帳目委員會尋日為咗呢件事進行聆訊，屋宇署官僚例牌死撐，唔肯認錯。不如先重溫一下審計報告點講吖，屋宇署執法不力，至今尚有多達六萬八千多份清拆令未有業主遵從，當中逾兩成已發出六至十年，最長達三十年，問你服未。咁仲唔止，喺四千五百多宗「須優先取締」僭建物嘅舉報個案中，屋宇署完成視察六個月至五年後居然仍未發出清拆令，可見所謂優先取締純屬大隻講。
最離譜嘅係，屋宇署之前每年平均清拆四萬多個僭建物，但到咗一一至一四年突然大縮水，平均每年只清拆一萬七千多個。立法會議員就鬧得啱嘞，屋宇署喺最近四年共獲政府撥款逾十二億元，較前大增五成二，但處理僭建物竟然比十年前仲少，錢就識攞，嘢就唔做，咁仲唔係歎慢板？
聽吓屋宇署署長點解畫吖。佢話喎，港府喺○一年提出十年執法計劃處理僭建物，但四年前臨時撥款結束，大量非合約公務員離職，加上近年劏房調查阻力重重，而且幾乎每年都有重大事故發生，搞到人手更加短絀。好似最近封閉涉及違規劏房嘅荃灣榮豐工廈咁，本來只安排三人跟進，最終要借調人手至十多人跟進。
喂，一句人手不足就將責任推得一乾二淨，咁咪好着數？政府不斷增加撥款畀屋宇署到底有乜作用呢？再講吖，之所以每年都有重大事故發生，咪就係因為屋宇署長期有法不依，執法不嚴，搞到問題積重難返，有乜法子唔出事吖。例如旺角花園街四級火造成九死三十四傷，又例如馬頭圍道唐樓大火引致四屍五命十九傷，全部係僭建及劏房肇禍。所以話，屋宇署執法懶懶閒，同草菅人命冇乜分別嘅咋。
可能當局都知衰啩，發展局局長陳茂波話喎，當局已向屋宇署增撥資源，包括近年逐步增加五成五人手，同埋今個年度增聘約一百五十名公務員。嗱，大家不妨聽住先，實際效果係點，仲要睇過至知。無論點都好啦，僭建問題尾大不掉，搞到危機四伏，令人防不勝防，唔該屋宇署做好自己份工，速速消除危機，否則遲早一鑊熟嘅咋，叮！
