城中鏡：下拍拍：李錦離輪界 教青少理財
唔經唔覺，法興證券環球股票產品部前董事Edmond李錦離開咗投行成個月有多，佢啱啱由澳洲探親返港，咁啱撞到記者，即問佢做乜離開輪界？去咗邊？
李錦繼續深造，報讀咗教育碩士課程。（資料圖片）
冀助建正確金錢觀
原來Edmond唔係跳槽，而係展開第二個工作人生。佢話嚟緊會全力透過課程、講座同電台節目咁，推廣兒童及青少年理財教育，由最簡單嘅儲蓄同分配資源開始教起，希望幫下一代提升理財EQ，建立正確正面嘅金錢觀。佢終極目標係，希望兒童及青少年理財教育可以納入小學或唔好遲過初中嘅常規課程。而Edmond自己亦會繼續深造，仲報讀咗教育碩士課程添！
離開投身咗超過二十年嘅金融業，捨得嗎？Edmond話勇搞理財教育，唔係為錢，再唔做就可能錯失機會，係時候要坐言起行咁話。
