法國五月《柯比意—二十世紀建築巨人》尋日舉行開幕慶典，現場見到影星林嘉欣。咦！點解會喺度見到佢呢？佢透露自己十年嚟不斷到世界各地尋找柯比意建築物，再用寶麗萊影低。喺呢次活動上，佢首次發表相集，當中收錄咗佢十年以來所拍嘅相片。

林嘉欣話家居內嘅畫同擺設都係佢一手安排嘅。

對建築抱濃厚興趣嘅佢，被問到係咪擔當屋企嘅室內設計師？佢笑言屋企係租嘅，但裏面啲畫、擺設都係佢安排嘅。

咁囡囡有冇遺傳佢嘅藝術天分？佢話：「囡囡都好鍾意畫畫、做手工藝，我哋興趣好似。不過，將來唔想囡囡做建築師，因為太大壓力，只要佢搵到自己熱愛嘅事做就得。」

愛女整餅 唔捨得食

提到母親節，佢透露將喺家中慶祝，問到囡囡會唔會送母親節禮物畀佢時，林嘉欣話：「都未到，仲有幾日。以前送過卡片、戴喺手嘅花圈同焗過心形餅，啲餅係一大一細嘅。好開心，唔捨得食，不過唔食會發霉，所以都係食咗。」

第一手消息請下載on.cc東網iPhone/iPad/Android/Windows Phone Apps