城中鏡：工總生日派撻益街坊
港式小食中嘅超級經典係乜？非蛋撻莫屬。香港工業總會為慶祝五十五歲生日，一眾高層尋日下晝齊集油塘一間餅店，着上圍裙為一個直徑十二吋、寫上「工」字嘅特別版蛋撻剪綵，同時由尋日朝早九點起，喺全港十二間指定餅店大派五千五百件新鮮出爐蛋撻，實行與眾同樂。講起食蛋撻，各人各有喜好，但共通點係一次過食幾件都冇問題喎。
出爐蛋撻香噴噴，鍾志平（左）同孫啟烈忍唔住歎番件。
鄭文聰（左起）、蘇錦樑同郭振華大啖食撻。
Greg蘇獨愛牛油皮
出席活動嘅包括工總副主席鄭文聰同郭振華，仲有前主席Roy鍾志平同孫啟烈等人。阿Roy帶頭派餅，佢把聲夠晒響，大嗌一聲，馬上吸引街坊停下腳步，排隊拎餅食。派得咁投入，皆因阿Roy係「超級撻迷」，佢話一次過食兩至三件冇難度。不過身為澳門人，阿Roy都係鍾情葡式蛋撻多啲，貪佢奶味較香濃。
商務及經濟發展局局長Greg蘇錦樑都有出席，見佢大大啖食咗件，胃口真係唔錯。蛋撻有牛油皮同酥皮之分，阿Greg就話獨愛牛油皮蛋撻，鍾意佢味道香啲，口感又滑啲，一次過食三、四件都面不改容。不過，隨着年紀有番咁上下，為免身形發胖，唔敢食太多咁話。
絕世好撻全靠用心
講番工總個特別版蛋撻，背後製作功臣係一對蛋撻店父子。到底要炮製出絕世好撻，有乜竅門？蛋撻王老闆莊任明話只要控制好品質，每個過程用心做，唔好出錯，自然會整出好味嘅蛋撻。莊任明兒子莊裕坤就話，跟住爸爸整餅二十年，真係瞌埋眼都識整。
