政壇：搞搞政：泛民難翻盤掌葵青區會
區議會喺二○一六年取消委任制，目前部分建制派同泛民勢力相若嘅區會或會變天，其中以過去由泛民主導嘅葵青等多個區議會最有機會「翻盤」，進而一舉扭轉有關區議會主席或副主席位置，但泛民嘅如意算盤未必敲得響，事關委任議員方平為連任葵青區會主席，已經鋪路轉戰民選議席，另有傳即使方平未能連任主席，建制派寧可接受葵青區會前主席、白鴿黨前成員周奕希接任，都唔會畀泛民代表奪得主席一職。
全港十八區議會形勢於取消區會委任議席後，將會產生微妙變化，事關建制派依家喺部分區會，要連同委任議員先攞到區主導權，舉例指撇除委任議席，葵青區嘅泛民略多於建制派，即十五席對十四席，據聞有關方面都擔心泛民好大機會重奪該區主導權。
方平密謀落區插旗
綜合各方消息，有傳建制派已做好兩手準備，一方面方平已有轉戰民選議席嘅落腳點，就係接替其政團成員譚惠珍，積極考慮喺安灝選區參選，成功當選就密謀連任區會主席。
但有地區人士分析，方平過去主持會議曾有甩漏，加上方平唔似部分區會主席出錢又出力，再任主席或有阻力，另一可能主席人選係曾做過兩屆區會主席嘅周奕希，據知佢一向被視為泛民一員，但早前退出白鴿黨，據報又獲委任為肇慶市政協，加上個別獨立泛民亦同周有傾有講，因此喺關鍵時刻為封殺泛民代表出任主席，建制派或考慮轉為畀周重掌主席一職。
聽聞個別選區亦有連場火併，有地區人士爆料早年被判詐騙罪成遭褫奪議席、被視為泛民一員嘅葵青區前議員梁廣昌，有傳想重出江湖，挑戰現任葵盛東邨選區議員嘅街工周偉雄，到時睇怕又係一場惡鬥。
