中港股市狂牛下，中資券商呢排可謂出盡風頭，接「大媽」生意都接到手軟，代表中資券商嘅中資證券業協會最近換咗莊，由交銀國際首席執行官譚岳衡接替國泰君安嘅閻峰做會長。下個禮拜二（十二日），中資證券業協會將舉行「風雨同舟八周年答謝酒會」，竟安排喺日頭而非收市後舉行，呢排股市上落咁大，經紀連中午飯都唔得閒食，中資證券業協會咁有信心當日會有大把人捧場，唔通中資券商真係喺股壇話晒事？

譚岳衡

聽講今次酒會同新會長就職典禮應該係分開舉行，今次純係協會慶祝八周年。酒會個名咁文藝已夠搶，酒會嘅時間仲厲害，喺上午十一時十五分開始恭候，儀式中午十二時開始！依家港股大時代，個市睇少一秒都走樣，但中資證券業協會一啲都唔驚會影響酒會出席人數，除咗特首應承出席，仲話已請咗幾百位香港同內地證券業人士、政府官員同立法會議員出席。中資券商依家喺香港嘅規模同影響力愈嚟愈勁，滬港通下，中資機構更不斷來港做收買佬，收購證券行擴充版圖，中資證券業協會至今已有超過七十五家中資證券、期貨及資產管理等機構做會員。邊個會唔畀面？

第一手消息請下載on.cc東網iPhone/iPad/Android/Windows Phone Apps