政壇：博鰲青年論壇 復辦加碼
本來喺舊年十一月舉辦嘅「博鰲亞洲青年論壇（香港）」，因佔領行動而要延期到本月下旬舉行，唔知係咪因為上年冇舉辦到，今年論壇首次由過往一日議程增加到兩日。主辦單位香港菁英會主席梁宏正話，今年活動新增首日嘅「青年觀察家圓桌」同「分論壇」環節，次日就係大型演講同論壇，預計兩日合共有約二千人參與。
梁宏正（左）同莊家彬拍住搞博鰲青年論壇。
菁英會常務副主席盧金榮話，今年會有嚟自唔同地方嘅年輕人同講者一齊出席，包括科技大學校長陳繁昌、阿里巴巴集團副總裁車品覺，仲有嚟自韓國、以色列等地嘅講者。今年主題集中圍繞科技、經濟同創新文化等，籌備委員會總指揮莊家彬話，智慧化技術帶嚟唔少發展商機，值得年輕人留意，佢近年就開始研究同公司合作生產「可屈曲電池」，因為智能手錶同電話愈出愈多，電池大小同耗電量都要跟上科技產品潮流而改進。
