政壇：座駕穿梭李漢奸家肥佬黎疑又攪局
壹傳媒集團前主席「肥佬黎」黎智英上月二十一日同家人漏夜離港去歐洲，事隔十多日後，肥佬黎嘅司機再次出動，駕駛肥佬黎平時坐開嘅七人車多次於黎宅、外號「李漢奸」嘅民主黨創黨主席李柱銘位於半山馬己仙峽道寓所同埋香港國際機場三個地點，神秘來回折返，原本一直唔見肥佬黎，直至深夜時分，肥佬黎先乘坐七人車返回寓所，認真耐人尋味。
肥佬黎（右）深夜乘坐七人車返回寓所。
陳日君一度現身李柱銘寓所並步行離開。
肥佬黎嘅七人車至少兩次出入李柱銘寓所。
尋日下午二時，記者見到肥佬黎嘅司機駕駛肥佬黎嘅七人車，接送肥佬黎嘅老婆同其中一個兒子返回位於何文田嘅黎宅；及至下午五時，肥佬黎嘅司機駕駛肥佬黎七人車出動，由黎宅直駛李漢奸位於半山寓所，肥佬黎七人車逗留約十五分鐘離開，而事隔一小時後又折返李漢奸寓所，留咗約十分鐘又再離開。
最耐人尋味嘅係，期間肥佬黎七人車嘅車窗窗簾全程拉上，肥佬黎本人全程無現身，及至晚上約六時半，反而見到天主教香港教區前主教陳日君喺李漢奸寓所大廈步行離開。
及至晚上八時，肥佬黎嘅七人車同私家車兩部車首次齊齊出動，其中私家車直接前往機場再返回黎宅，全程空車出入，冇見接載任何人，直至深夜十一時十五分左右，肥佬黎終於乘坐七人車返回黎宅，肥佬黎直至深夜先神秘現身，莫非又密謀「攪局」？
